thebeibs

Forvitninni svalað

Í dag fékk ég svohljóðandi bréf

Ég skal nú ekki fullyrða um það hvort Jón Baldvin les dagbókina ykkar, en mér þykir þó líklegra að þú hafir rekist á ummerki eftir einmana efnafræðing í Vostúnalandi. Það er nefnilega svo að þegar verkefnalistinn samanstendur fyrst og fremst af lestri greina um þéttefnisfræði annars vegar og grúsks í torlæsilegum FORTRAN kóða hins vegar, verður freistingin að kíkja aðeins á netið ómótstæðileg.

Ég hélt sjálfur úti vefdagbók þangað til sl. janúar, en þá gafst ég upp á þessu, því ég var orðinn gjörsamlega þurrausinn af andargift. Ég velti því fyrir mér fyrr í sumar að taka þennan (ó)sið upp aftur, en hef ekki ennþá látið verða af því. Ég er hins vegar ennþá dyggur lesandi annarra mannadagbóka, m.a. Stjána og Stellu, og nú síðast ykkar.

Ég vona að þetta svali forvitni þinni (og þér veitir líklega ekki af einhverju svalandi miðað við hvernig hitastigið er hérna norður frá).

Ég bið að heilsa Gunna.

Kveðja,
Finnbogi Óskarsson
efnafræðingur og túbuleikari

Þá er forvitninni svalað, mér líður miklu betur :) Eftir að hafa farið inn á heimasíðuna hans Finnboga komst ég að því að ég hafði oft séð þennan dreng á göngum VR II. Þeir Gunni þekkjast líka eitthvað og hann er góður vinur hennar Líneyjar vinkonu Gunna.
Jæja, ég vona að öllum öðrum líði betur líka :o)

Annars var dagurinn hjá mér frekar leiðinlegur, ég eyddi mestum tíma mínum í að fara yfir stærðfræðdæmi. Það jákvæða er nú samt að ég fór yfir skammtinn fyrir morgundaginn líka þannig ég á alveg frí á morgun. Jíbbí kóla

Posted by at 25.07.01 21:04